Müvafiq beynəlxalq standartlara uyğun hazırlanmış maliyyə hesabatlarına əsasən, “ABB İnvest İnvestisiya Şirkəti” QSC-nin 2022-ci il üzrə xalis mənfəəti 2021-ci ilə nisbətən 194% (təxminən 3 dəfə) artaraq 627 min 827 manat təşkil edib. Şirkət 2021-ci ili 213 min 295 manat xalis mənfəət ilə bağlamışdı.

“ABB İnvest İnvestisiya Şirkəti” QSC-dən Marja-ya daxil olmuş məlumatda bildirilir ki, şirkətin xalis faiz gəlirləri 11.5% artaraq 433 milyon 29 min manat, qeyri-faiz gəlirləri isə 375% artmaqla 1 milyon 149 min 505 manat olub.

2022-ci il sonuna Şirkət 14 milyon manat məbləğində aktivlərə malik olub.

Bakı Fond Birjasının açıqladığı statistik məlumatlara əsasən, “ABB-İnvest”in 2022-ci il üzrə qiymətli kağızlarla ümumi ticarət dövriyyəsi əvvəlki ilə nisbətən 176% artımla 2 milyard 958 milyon 708 min 318 manat təşkil edib.

 “ABB-İnvest İnvestisiya Şirkəti” səhmdarı olan “ABB” ASC ilə birgə yeni investisiya məhsulunu da bazara təqdim edib. Müştərilərə xarici bazarlarda ticarət olunan səhmlərə ABB mobile üzərindən asanlıqla investisiya etmək imkanı yaradılıb.



marja.az